EBI sareko Elizbarrutiko ikastetxeen artean dagoan Otxarkoaga ikastegiak Bilboko udalak, ‘Agenda 21’ dalakoaren barruan, antolatu dauan ‘Tipi-tapa’ egitasmoan parte hartu dau. Ikastegiko 16 eta 17 urteko ikasleek bertako 15-20 zuhaitz eta 40 landare inguru landatu dabez, ingurumena hobetzeko eta auzoko bizilagunei aisialdirako leku egokia eskaintzeko. ‘Txotenako bihurguneak’ deitutako lekua garbitu dabe eta bertan landatu dabez zuhaitzak, aisialdirako gunean. Udaletik adierazo dabenez, jarduera honen bitartez ikasleei errealitateaz eta gabeziez jabetzen lagundu gura jake, “ingurumena eraldatuz, inguruko gizarte eraldaketa eragiteko”.
Ikasleek auzoaren historia ezagutu daien eta inguruak eta lorategiak zaintzearen garrantziaz jabetu daitezan, ‘Tipi-tapa’ egitasmoak hiru jarduera sustatu ditu: zine-forum emonaldi bi, bisita gidatua auzoan eta gaur burutu dan garbiketa eta zuhaitz eta landareen landaketa.
Holan, auzoko ingurumena hobetu dabe eta paseoak emoteko eta aisialdirako lekua atondu. Era berean, udaletik zakarrontzi eta bankuan ipini dabez, bertara doazenak erosoago egon daitezan.
Landareei buruzko azalpenak
Jarduera burutu aurretik, mobikortasun eta jasangarritasunerako udaleko arloko langileek berbaldia eskaini dabe, gazteei zuhaitz eta landareak landatzeko aholkuak emonez eta zuhaitz eta landareei buruzko bitxikeriak kontatuz.
Alvaro Perez mobikortasun eta jasangarritasunerako arloko zinegotziak eskerrak emon deutsez partaideei eta zoriondu egin ditu. Bere esanetan, “lagundu egin deuskue eta Bilbao uri jasangarri eta osasungarriagoa egiteko helburua lortzeko ahaleginean lankide doguz”.