Bilboko Gotzaindegiaren esku dagoan EBI sareko (Elizbarrutiko Ikastetxeak/Centros Diocesanos) 19 ikastetxeetako mila ikasle inguruk parte hartuko dabe eguen honetan, urtarrilaren 22an, ‘EBI STEAM Azokaren’ bosgarren edizioan. Azoka zientifiko eta artistiko honetan, adin guztietako ikasleek, Haur Hezkuntzatik Batxilergora Lanbide Heziketakoak be kontuan izanda, STEAM diziplinei lotutako ehun proiektu inguru aurkeztuko dabez (zientziak, teknologia, ingeniaritza, artea eta matematikak, ingelesezko sigletan), gaur egungo hezkuntzan ezinbestekotzat joten diranak.
Ekitaldia Muskizko Somorrostro eta San Juan Ikastetxeetan egingo da eta 10:00etan hasiko da, Muskizko Udaleko, Bilboko Gotzaindegiko eta hezkuntza arloko arduradunek egingo daben inaugurazioagaz. Jarraian, ikasleek proiektu zientifikoak, teknologikoak eta artistikoak azaldu eta aurkeztuko dabez.
Adin guztietako neska-mutilek proiektu zientifiko eta teknologiko barritzaileak aurkeztuko dabez, hala nola unibertsoaren historian zeharreko bidaia interaktiboak, eguzki-sistemari buruzko maketa robotizatuak, anatomiari, boligrafoei, betaurrekoei eta 3D inprimagailuei buruzko esperimentuak, ikasleek eraikitako musika-tresnak, dibulgazio zientifikoko proiektuak, sistema robotikoak eta robot automatak edo itsasoan bizirauteko kitak, zientzia, teknologia edo arteagaz lotutako hamaika proposamenen artean.
Proposatzen dabezan STEAM irtenbideak eta proiektuak, gainera, ikasleek beren ikastetxeetan ikasten dabezan ikasgaiekin lotuta dagoz, eta, horregaitik, azken hilebeteetan EBI sareko ikastetxe eta ikastoletan ezarritako metodologien arabera egindako lanak dira.
Edizio honetan, gainera, V. EBI STEAM Azokak tailer eta erronka zientifiko eta hezitzaile batzuk sartu dauz, goiz osoan ikasle guztiak inplikauko dabezanak. Holan, jolas interaktiboak, DJ tailerrak, laser grabagailuak edo Lanbide Heziketako hainbat gradutako ikasleek antolatutako ule-apainketako eta manikurako jarduerak izango dira. Ikastetxeetako standak Somorrostro Ikastetxeko areto nagusian eta gimnasioan egongo dira, eta tailerrak, barriz, San Juan Ikastetxean.
Bokazio zientifikoak indartzea
Azokak helburu bikoitza dau. Alde batetik, hezkuntza-sareak bokazio zientifikoak piztu eta indartu gura dauz ikasleen artean, bai mutilen bai nesken artean, eta, bestetik, azken urteetan ikastetxe eta ikastoletan ezarritako metodologia barritzaileen emaitzak erakutsi gura dauz, batez be proiektuetan eta erronketan oinarritutako ikaskuntza.
Bilboko Gotzaindegiaren menpeko sareak 19 ikastetxe dauz Bizkaia osoan, ikastola, ikastetxe eta lanbide heziketako ikastetxeen artean, eta 13.000 ikasle eta 1.100 irakasle baino gehiago dauz. Ikastetxeetan, EBI sareak Haur Hezkuntza 0 urtetik aurrera, Lehen eta Bigarren Hezkuntza, Batxilergoa, Lanbide Heziketa maila guztietan, hezkuntza berezia edo enplegurako hezkuntza eskaintzen dauz.
Hezkuntza-talde aitzindaria
Hezkuntza-taldeak, ikastetxeen bidez eta, batez be, ikasleen bidez, ezarritako metodologia pedagogikoen emaitza erakutsiko dau. Izan be, EBI sarea aitzindaria izan da hezkuntza-eredu aurreratuenetako batzuk ezartzen, diziplina zientifikoak eta teknologikoak indartzeko. Holan, robotika eta xakea eskola-curriculumaren barruan, irakasgai gisa, adimen logiko-matematikoa sustatzeko helburuagaz.
Ikaskuntza eredu horren guztiaren ondorioz, ikasleek «informazioa aztertzeko, bahetzeko, hausnartzeko, sakontzeko eta azaltzen jakiteko gaitasunak hobetzen dabez». “Lehenengo esperientzietatik, ikastetxeetan, umeek ezezagunari eta ustebakoari aurre egiten ikasten dabe, eten barik aldatzen dan mundu batean moldatzen ohitzeko”, azaldu dau Nerea Begoñak, EBI Elizbarrutiko Ikastetxeak sareko zuzendariak. “Gaur egun, gure konpromisorik garrantzitsuena hurrengo belaunaldia mundu konplexu honetarako heztea da”, gehitu dau.
EBI sarea ikastetxe honeek osatzen dabe: Bilboko Ángeles Custodios Ikastetxea; Ondarroako Antiguako Ama Arrantza Eskola; Bilboko Artxandape Ikastola; Sodupeko Avellaneda Ikastetxea; Bilboko Begoñazpi Ikastola; Markinako BeraKruz Ikastola; Muskizko Somorrostro Ikastetxea; Bilboko Otxarkoaga Ikastetxea; Barakaldoko La Inmaculada Ikastetxea; Bilboko Iparragirre Ikastola; Erandioko Jado Ikastetxea; Elorrioko Maria Bitarteko Ikastetxea; Santurtziko Patronato Ikastetxea; Bermeoko Sagrado Corazón Ikastetxea; Ortuellako San Felix Ikastola; Gernikako San Fidel Ikastola; Muskizko San Juan Ikastetxea; Sopuertako San Viator Ikastetxea eta Zeanuriko Zulaibar Ikastegia.
Azoka zientifikoak Gastronomía Cantábrica, Lansegur, Banco Sabadell, Grupo Solitium, Iberdrola, Umas Mutua de Seguros eta PIB Group Iberia erakundeen laguntza dau.